ഒരു നൂറ്റാണ്ടിനപ്പുറത്തെ ചരിത്രത്തിന്റെ ഓർമകൾക്ക് പുതുജീവൻ നൽകി കുന്നോന്നിയിൽ നടന്ന ശ്രീനാരായണ ഗുരുദേവ ജയന്തി ആഘോഷം.

ഒരു നൂറ്റാണ്ടിനപ്പുറത്തെ ചരിത്രത്തിന്റെ ഓർമകൾക്ക് പുതുജീവൻ നൽകി കുന്നോന്നിയിൽ നടന്ന ശ്രീനാരായണ ഗുരുദേവ ജയന്തി ആഘോഷം. ഗുരുദേവൻ പൂഞ്ഞാർ മങ്കുഴി ക്ഷേത്രത്തിൽ എത്തിയപ്പോൾ നാമകരണം ചെയ്ത 101-ാം വയസ്സുള്ള പാലംപറമ്പിൽ സുശീലാമ്മയെ കാണാൻ ചതയദിന ഘോഷയാത്രയിലെ ഗുരുദേവന്റെയും മഹാബലിയുടെയും ഗണപതി ഭഗവാന്റെയും വേഷധാരികൾ വീട്ടിലെത്തിയത് ആഘോഷത്തിലെ വേറിട്ട കാഴ്ചയായി.

ഘോഷയാത്രയിൽ സുശീലാമ്മ പങ്കെടുത്തിരുന്നില്ല. പകരം, ഗുരുദേവന്റെയും മഹാബലിയുടെയും ഗണപതി ഭഗവാന്റെയും വേഷമിട്ടവർ ചരിത്രത്തിന്റെ ആ സാക്ഷിയെ തേടി വീട്ടുമുറ്റത്തെത്തുകയായിരുന്നു. നൂറ്റാണ്ടിന് മുമ്പ് ഗുരുദേവന്റെ സന്നിധിയിൽ പേര് ലഭിച്ച സുശീലാമ്മയെ ചതയദിനത്തിൽ ഗുരുദേവന്റെ വേഷമിട്ടയാൾ ഉൾപ്പെടെയുള്ളവർ വീട്ടിലെത്തി കാണുന്നത് അപൂർവ കാഴ്ചയായി മാറി.

1927-ലാണ് ശ്രീനാരായണ ഗുരുദേവൻ പൂഞ്ഞാറിലെത്തിയത്. ശിവഗിരിയിൽനിന്ന് മുൻകൂട്ടി നിശ്ചയിച്ച പ്രകാരം ക്ഷേത്രപ്രതിഷ്ഠയ്ക്കായി ഇടപ്പാടിയിലെത്തിയ ഗുരുദേവനെ പൂഞ്ഞാറിൽനിന്നുള്ള സംഘം സന്ദർശിക്കുകയും പൂഞ്ഞാറിലെത്തണമെന്ന് അഭ്യർഥിക്കുകയും ചെയ്തു. തുടർന്ന് ഗുരുദേവൻ പൂഞ്ഞാറിലെത്തി.

ഇന്ന് മങ്കുഴി ആകൽപാന്തപ്രശോഭിനി ശ്രീസുബ്രഹ്മണ്യസ്വാമി ക്ഷേത്രം സ്ഥിതിചെയ്യുന്ന സ്ഥലത്ത് അന്ന് ഭജനമഠമായിരുന്നു. അവിടെ ഗുരുദേവൻ വേൽ പ്രതിഷ്ഠ നടത്തി. പിന്നീട് ക്ഷേത്രസങ്കേതമായി വളർന്ന ഈ സ്ഥാപനത്തിന് ആകൽപാന്തപ്രശോഭിനി ശ്രീസുബ്രഹ്മണ്യസ്വാമി ക്ഷേത്രം എന്ന് നാമകരണം ചെയ്തതും ഗുരുദേവനായിരുന്നു.ഈ സന്ദർശനത്തിനിടെയാണ് സുശീലാമ്മയുടെ ജീവിതത്തിലെ അപൂർവമായ ചരിത്രനിമിഷവും സംഭവിച്ചത്.

അന്ന് വേലംപറമ്പിൽ വി.ഐ. കൃഷ്ണൻ ആറുമാസം പ്രായമുള്ള കുഞ്ഞിനെയും കൈയിലെടുത്ത് ഗുരുദേവന്റെ സന്നിധിയിലെത്തി. കുഞ്ഞിനെ അനുഗ്രഹിച്ച ഗുരുദേവൻ ‘സുശീല’ എന്ന പേര് നൽകുകയും അന്നപ്രാശം നടത്തുകയും ചെയ്തുവെന്നാണ് കുടുംബത്തിൽ തലമുറകളായി സൂക്ഷിക്കുന്ന ചരിത്രസ്മരണം. മറ്റൊരു കുട്ടിക്ക് ‘സുരേന്ദ്രൻ’ എന്ന പേരും ഗുരുദേവൻ നൽകിയിരുന്നു.

ഗുരുദേവന്റെ കൈകളിൽനിന്ന് നേരിട്ട് പേര് ലഭിച്ച ആ കുഞ്ഞാണ് ഇന്ന് 101-ാം വയസ്സിലെ പാലംപറമ്പിൽ സുശീലാമ്മ. ഗുരുദേവനാൽ നാമകരണം ചെയ്യപ്പെട്ടവരിൽ ഇന്ന് ജീവിച്ചിരിക്കുന്ന അപൂർവ വ്യക്തികളിലൊരാളാണ് സുശീലാമ്മ.

കുറ്റിക്കാട്ട് രാഘവൻ നാരായണന്റെ ഭാര്യയായ സുശീലാമ്മയ്ക്ക് 13 മക്കളുണ്ട്. നാല് തലമുറകളിലായി വളർന്ന വലിയ കുടുംബത്തിന്റെ കാരണവരായി 101-ാം വയസ്സിലും സുശീലാമ്മ നിറഞ്ഞുനിൽക്കുന്നു. ഗുരുദേവൻ നേരിട്ട് നൽകിയ പേരിന്റെയും അനുഗ്രഹത്തിന്റെയും ഓർമകൾ ഇന്നും കുടുംബം ഏറെ ആദരവോടെ സൂക്ഷിക്കുന്നു.